Ye wo sach h k jisa ik jhan man gia Nath shreef lyric, kalam peer naser uddin naser Golra shreef

 ye wo sach h k jisa ik jhan man gia Nath shreef lyric ,klam Peer naser uddin naser shah shab Golra shreef

یہ وہ سچ ہے کہ جسے ایک جہاں مان گیا

در پہ آیا جو گدا بن کے وہ سلطان گیا

اس کے اندازِ نوازش پہ میں قربان گیا

نعمتیں بانٹتا جس سمت وہ ذیشان گیا

ساتھ ہی منشئی رحمت کا قلمدان گیا

تجھ سے جو پھیر کے منہ جانب قرآن گیا

سرخرو ہو کے نہ دنیا سے وہ انسان گیا

کتنے گستاخ بنے کتنوں کا ایمان گیا

لے خبر جلد کہ غیروں کی طرف دھیان گیا

مرے مولیٰ مرے آقا تیرے قربان گیا

تیری چاہت کا عمل زیست کا منشور رہا

تیری دھلیز کا پھیرا میرا دستور رہا

یہ الگ بات کہ تو آنکھ سے مستور رہا

دل ہے وہ دل جو تیری یاد سے مستور رہا

سر وہ سر ہے جو ترے قدموں پہ قربان گیا 

دوستی سے کوئی مطلب ، نہ مجھے بَیر سے کام

ان کے صدقے میں کسی سے نہ پڑا خیر سے کام

ان کا شیدا ہوں مجھے کیا حرم و دَیر سے کام

انہیں مانا ، انہیں جانا ، نہ رکھا غیر سے کام

للہ الحمد میں دنیا سے مسلمان گیا 

احترامِ نبوی داخل عادت نہ سہی 

شِیر مادر میں اصیلوں کی نجابت نہ سہی 

گھر میں آداب رسالت کی روایت نہ سہی 

اور تم پر مرے مولیٰ کی عنایت نہ سہی

نجدیو! کلمہ پڑھانے کا بھی احسان گیا 

بام مقصد پہ تمناؤں کے زینے پہنچے

لب ساحل پہ نصیر ان کے سفینے پہنچے

جن کو خدمت میں بلایا تھا نبیﷺ نے پہنچے

جان و دل ، ہوش و خرد ، سب تو مدینے پہنچے

تم نہیں چلتے رضا سارا تو سامان گیا

کلام پیر سید نصیر الدین نصیر گولڑہ شریف